Kryetari i Partisë Demokratike, Sali Berisha, ka deklaruar se do të zhvillojë negociata serioze me Shpëtim Idrizin për të krijuar një koalicion për zgjedhjet parlamentare të 11 majit 2025.

Në një konferencë për shtyp, Berisha vlerësoi partinë e Idrizit si një aleat të rëndësishëm dhe theksoi se çdo parti që synon të rrëzojë kryeministrin Edi Rama është e ftuar në koalicion.

Ai theksoi se përpjekjet për të zgjeruar frontin opozitar do të vazhdojnë edhe me parti të tjera.

“Shpëtim Idrizi është një aleat dhe ne do zhvillojmë negociata serioze. Ne e vlerësojmë partinë e zotit Idrizi si një aleate të çmuar.

Ne do bëjmë gjithçka për të zgjeruar frontin opozitar edhe me parti të tjera. Unë çdo ditë po ftoj parti të tjera, edhe ato që janë të pavendosura, uroj që të vendosin dhe të bashkohemi në një front për të larguar Edi Ramën nga pushteti. Të gjitha të tjerat, nuk përjashtoj unë…”, tha Berisha.

Ndërkohë, Berisha mbylli edhe një herë derën për një bashkëpunim me Lulzim Bashën, duke thënë se Basha është i lidhur me Taulant Ballën dhe nuk i përket koalicionit opozitar që synon largimin e Ramës nga pushteti.

Ai shtoi se është i hapur për bashkëpunim me çdo parti tjetër që ka të njëjtin qëllim për largimin e Ramës.

“Basha është me Taulant Ballën, mos i ngatërro aleancat natyrale. Ka parti Alibeaj? Po ku e ka? Unë nuk po e paragjykoj atë.

O zotëri, ata janë me vota të PD-së, të mos bëjmë kështu. Megjithatë unë nuk po paragjykoj asgjë, por të mos harrojmë se atë mandat e kanë me votat e PD, po u teket të dalë mënjanë… Nuk i paragjykoj, jo, pavarësisht.

Thashë, Basha ka partinë e Taulant Ballës. Me të gjitha forcat politike që përcaktojnë si objektiv largimin e Edi Ramës nga pushteti… Kjo qëndron.

Nuk përjashtoj asnjë… Tani, kur bëhet publike, nuk ka pse të mos bëhet jopublike. Por edhe publike ka dhe do ketë”, shtoi ai.