Një gjë është 100% e sigurtë, në 11 Maj fiton PS-ja

Koment nga Bilbil Beqiri -Botues i Podiumi.com

Një gjë është 100% e sigurtë, në 11 Maj fiton PS-ja

Unë besoj se shqiptarët e kuptojnë rëndësinë e rrotacionit në qeverisjen e vendit, por për të ndodhur rrotacioni duhet që opozita ta përfaqësojë atë.

Duhet që opozita të jetë e re në frymë dhe në energji, e mbushur me njerëz dhe fytyra të dashura për publikun e gjerë. Me njerëz të mirë, të ndershëm, të tillë që nuk të bën zemra t’i refuzosh.

Në Kosovë Edona Llalloshi mori 30 mijë vota personale.

Kur njerëzit të duan ta japin voten, të japin edhe shpirtin

Në Turqi, më saktë në Stamboll, kandidati simpatik i dashur nga populli i tregoi botës se kandidati i mirë “thyen në mes” çdo lloj autokracie. Ekrem Imamoglu fitoi dy herë zgjedhjet përballë supermakinerisë ekonomike dhe mediatike të Erdogan.

Në Shqipëri opozita për shkak të proceseve që kaloi brenda vetes, edhe kësaj here e ka të pamundur të ofrojë frymë dhe fytyra të reja, të dashura për publikun.

Për shkak të proceseve që kaloi Brenda vetes, opozita edhe kësaj here nuk del dot nga qerthulli ku është futur. Premtimet dhe zotimet e bëra rrugës gjatë kacafytjeve të brendshme e kanë futur në rreth vicioz.

Nuk ecet gjithmonë me filozofinë kur s’është pula hahet sorra.

Edhe njëherë unë besoj se shqiptarët e kuptojnë rëndësinë e rrotacionit dhe pikërisht për këtë arsye skuadra opozitare do ndëshkohet përsëri.

Opozita duke nxjerrë nga mikrovala fytyra që publiku i gjerë i ka refuzuar njëherë nuk bën gjë tjetër veçse i heq vetes nga duart mundësinë e artë të ardhjes në pushtet, dhe vendit mundësinë e rrotacionit politik.

/ Podiumi.com media online prej vitit 2016