Pandemia globale e koronavirusit “me shumë gjasa” ka origjinën nga një cep ekzotik i kafshëve të egra në një treg në qytetin kinez të Wuhan, sugjeron një studim i ri. Përhapja e Covid-19 u zbulua për herë të parë në tregun me shumicë të ushqimeve të detit Huanan në dhjetor 2019.

Sipas autorëve të një punimi të botuar të enjten në “Cell”, një revistë shkencore amerikane e rishikuar nga kolegët, kafshët që janë “pritëse të ndërmjetme të besueshme” të SARS-CoV-2, virusi që shkakton Covid-19, ishin të pranishme në vendin brenda tregut me të cilin u lidhën rastet e para të sëmundjes.

Hulumtimi u përqendrua në mostrat e mbledhura nga shkencëtarët kinezë në janar 2020 nga kanalet e kanalizimeve, kafazet dhe dyshemeja në cepin jugperëndimor të tregut, ku dihej se kafshët e egra shiteshin.

Ndër speciet, ADN-ja e të cilëve u zbulua ishin rakunet, civeti, miu i bambusë, iriq Amur, derri malajas, baldosa dhe marmota e Himalajeve.

Rakunët dihet se janë të ndjeshëm ndaj infeksioneve Covid-19 dhe janë në gjendje të transmetojnë virusin, vunë në dukje autorët.

“Dëshmi të gjera epidemiologjike mbështesin pikën e shitjes së kafshëve të egra në tregun Huanan si kanali më i mundshëm për origjinën e pandemisë COVID-19,” thuhej në raport.

Sipas autorëve, kafshët e infektuara me SARS-CoV-2 mund të jenë sjellë në treg dhe virusi më pas ka kaluar te njerëzit.

“Origjina më e mundshme e kësaj pandemie është ajo për të cilën ne kemi qenë gjithmonë të shqetësuar.” – tha bashkë autori Michael Worobey, i cili është kreu i Departamentit të Ekologjisë dhe Biologjisë Evolucionare në Universitetin e Arizonës.

Kritikët e studimit kanë theksuar megjithatë, se mostrat nuk ishin përfaqësuese pasi ato ishin marrë nga një seksion specifik i tregut.

Pasi u zbulua për herë të parë në Kinë në dhjetor 2019, virusi SARS-CoV-2 u përhap me shpejtësi në mbarë botën, duke bërë që Organizata Botërore e Shëndetësisë (OBSH) të karakterizojë shpërthimin e Covid-19 si një pandemi më 11 mars 2020.

Më shumë se 7 milionë njerëz kanë vdekur nga sëmundja e koronavirusit në mbarë botën deri më tani, sipas OBSH-së.