Pse nuk e la Rama ligjin për mbetjet për mandatin e dytë?

Le të hyjmë pak në real politikë, t’i lemë të gjitha për momentin…Rama shpreh një siguri maksimale për fitimin e zgjedhjeve të ardhshme. Rama flet për rritje të ekonomisë, për rritje të investimeve të huaja. Rama flet për ulje të papunësisë. Rama dhe ministrat e tij flasin për rritje të turizmit shqiptar. Pra, në këtë aspekt, industria e përpunimit të mbetjeve siç mbeti “off” për vite e vite me radhë, mund të rrinte edhe 8 muaj sa të vinin zgjedhjet e ardhshme.

Nga ana tjetër pikërisht, pse jemi 8 muaj para zgjedhjeve qeveria po ul gjobat për biznesin, po flet për rritje rrogash etj etj. Si çdo qeveri po përpiqet të mbarojë disa vepra që të lerë gjurmë për mirë, pikërisht për këtë ditë. Përkundër gjithë këtyre përpjekjeve, duke e ditur të gjithë, pasi e ka dëshmuar edhe vetë që është një nga qeveritë që kujdeset më shumë se çdo gjë tjetër për fasadat, kujdeset më shumë se gjithçka për imazhin, pikërisht kjo lloj qeverie, shkon dhe varros pikërisht 8 muaj para zgjedhjeve një nga kauzat e veta me të mëdha morale, duke e ditur shumë mirë që do të ketë pasoja për të, madje duke rrezikuar dhe me mesazhin përfundimtar, pikërisht 8 muaj përpara zgjedhjeve: duke parë në Parlament për herë të parë pikërisht në një kohë gati fushatë, numrin e frikshëm 63 si mazhorancë. Çfarë tregon kjo? Thjesht, pastër, shqip, kjo tregon që kryeministri ka pushuar së menduari si politikan, thjesht po mendon si biznesman. Kaq lexohet qartë.