Kryeministri Edi Rama ka reaguar i fundit nga krerët e lartë të shtetit lidhur me ngjarjen e rëndë në veri të Kosovës, ku sulmet ndaj policisë i morën jetën një efektivi dhe plagosën një tjetër.

Përmes një postimi në platformën “X”, Rama shkruan se ngjarja e fundit është një kambanë alarmi që dëshmon eskalimin e tensioneve mes Kosovës dhe Serbisë.

Rama i mëshon idesë së tij për një konferencë të jashtëzakonshme paqeje, por i kurën fjalët për të dënuar presidentin serb Aleksandër Vuçiç.

“Tragjedia e humbjes së jetës së efektivit të Policisë së Kosovës është këmbana më e madhe e alarmit deri më sot për rrezikun e vazhdueshëm të eskalimit të krizës së zgjatur në një konflikt të armatosur. Kriminelët që i morën jetën një njeriu të pafajshëm, i cili shërbente nën uniformën shtetërore të forcave të rendit të Republikës së Kosovës, duhet të dalin përpara drejtësisë.

Komuniteti euroatlantik duhet të mbledhë të gjithë forcën e tij imponuese dhe të ulë pa kthim, Kosovën dhe Serbinë në tryezën e Dialogut të Normalizimit. Thirrja e një konference të jashtëzakonshme paqeje, nën mbikqyrjen e garancinë e Bashkimit Europian dhe Shteteve të Bashkuara, e njëkohësisht marrja e të gjitha masave të jashtëzakonshme me KFOR-in, për moslejimin e eskalimit të mëtejshëm të situatës, janë një domosdoshmëri strategjike jo vetëm për rendin e sigurinë në Kosovë sot, po edhe për paqen e të ardhmen e rajonit nesër, përpara sesa kriza e zgjatur në Veriun e Kosovës të dalë jashtë kontrollit e të kthehet në një zjarr destabilizues për krejt rajonin”, shkruan Rama.