Dua Lipa tregon 5 librat e preferuar për feminizmin

INSTAGRAM / @DUALIPA

Dua Lipa është ylli i kopertinës së shtatorit për Vogue France dhe mes shumë detajesh, ajo ndan edhe 5 librat feministë të preferuar, që e kanë frymëzuar gjatë jetës dhe karrierës së saj.
 
“Teoria e King Kongut” nga Virginie Despentes

 
Në këtë libër feminist, autorja ka një qasje të prerë mbi realitetin mes burrave dhe grave të formësuara që në moshë të re nga shoqëria patriarkale. Kjo është pikërisht teoria e King Kongut dhe tregon reflektimet e pakufishme të autores mbi çështjet e feminizmit, seksualitetit, prostitucuionit dhe përdhunimit.
 
“Seksi i Dytë” nga Simone de Beauvoir

 
Simone de Beauvoir është ndoshta një prej filozofeve dhe feministeve më të shquara që ka frymëzuar breza të tërë dhe veprat e saj ende vijojnë të kenë ndikim në autorët e rinj. “Seksi i dytë” zbulon identitetin gjinor dhe sfidon idenë se rolet me bazë gjinore janë të lindura.
 
“Queenie” nga Candice Carty-Williams

 
Në romanin e saj të parë, Candice tregon historinë prekëse të Queenie, një gruaje të re, emigrante me ngjyrë, e cila lufton për të dalë nga spiralja ku ka ngecur, mes një ndarjeje, humbjes së punës dhe racizmit.
 
“Feministe e keqe” nga Roxane Gay

 
Autorja amerikane, Roxane Gay i ka hapur rrugën feminizmit të ri, çlirues dhe të pafre, pasi libri nxjerr në pah diskriminimet me të cilat ndeshen shpesh gratë dhe liritë që ato duhet të gëzojnë, pa u cenuar të drejtat e tyre.
 
“Monologjet e vaginës” nga Eve Ensler

 
Eve Ensler u jep grave një zë të fuqishëm dhe të plotë. Organi femëror flet aq bukur mbi çështjet e seksualitetit, tregon frikërat më të thella, si dhe historitë intime të grave që pasqyrojnë pyetjet universale.

Dua shpesh ka sugjeruar libra, ndër të tjera edhe autorin shqiptar, Ismail Kadare. Pak kohë më parë, Dua tregoi se këto 2 libra të autorit e shoqëronin për pushime:

Libri i parë, titulli në origjinal i të cilit është “Tri këngë zie për Kosovën”, përbëhet nga tri tregime, “Lufta e vjetër”, “Zonja e madhe” dhe “Lutje mbretërore”, të cilat bëjnë fjalë për Betejën e Kosovës më 1389-n dhe pasojat e saj.

Libri i radhës, me titull në origjinal “E penguara, Requiem për Linda B.”, është një libër për vajzat shqiptare që u lindën e u rritën në internim.

Sipas Kadaresë, “Libri flet për një njeri të penguar. Zakonisht në traditën e letërsisë botërore pengesën e krijon fati, këtu është përshkruar një pengesë e një tipi të ri më të vonshëm se fati, pengesa e shtetit. I kushtohet të gjithë vajzave shqiptare që kanë pësuar internimin dhe jo një emri, apo një tjetri.”