Skenat intime mund të jenë momente të ndjeshme për t’u portretizuar në kamera dhe nuk është e pazakontë që aktorët të kenë kufij, ose rezerva kur bëhet fjalë për interpretimin e këtyre skenave. Pavarësisht dekadave të përvojës në ekran, aktori Liam Neeson kohët e fundit pranoi se ka ende një gjë me të cilën ai nuk është ndjerë rehat dhe se skenat intime nuk janë të preferuarat e tij, madje përkundrazi.

Komentet e aktorit vijnë pas atyre të bëra nga Penn Badgley, i cili kohët e fundit u bë kryefjalë për vendimin e tij për të mos xhiruar më skena intime për serialin e tij, You. Sa për Neeson, ai tha se do të preferonte t’i shmangte plotësisht.

“Po, jam absolutisht dakord dhe e mbështes atë. Nuk më pëlqen t’i bëj ato skena. Unë kam bërë mjaftueshëm nga ato skena më parë dhe do të kisha preferuar t’ia lija imagjinatës. Do të jem i sinqertë. Kur shoh një skenë seksi, thjesht nuk mund ta shikoj. Thjesht më vjen turp. Unë e di se aktorët kanë regjisorë e staf aty mbi kokë, por si shikues s`kam fare nevojë t`i shoh ato skena”.

Si rrëfimi i Neeson-it se sa në siklet ndihej, po ashtu edhe vendimi i Badgley për të mos xhiruar këto skena theksojnë shqetësimin në rritje në industrinë filmave për mënyrën sesi aktorët trajtohen në situata të tilla. Siguria dhe mirëqenia e aktorëve në xhirime janë thelbësore që ata të ndihen sigurt dhe që kufijtë e tyre të respektohen.