Manuel Neuer

Portieri i Bayern Munich dhe i kombëtares gjermane, Manuel Neuer, ka zbuluar se ka bërë tri operacione për kancerin e lëkurës në fytyrë. 

36-vjeçari tha se historia e tij e kancerit ishte një forcë shtytëse, pas vendimit për t’u bashkuar me bashkatdhetaren dhe tri herë kampionen e tenisit në “Grand Slam”, Angelique Kerber, për të lëshuar një gamë produktesh për kujdesin e lëkurës, të quajtur “Newkee”.

“Ne të dy kemi një histori shumë personale të sëmundjeve të lëkurës. Në rastin e Angelique është hiperpigmentim i lidhur me diellin, në rastin tim është kanceri i lëkurës në fytyrë. Pra, fytyrën më është dashur ta operoj tri here deri tani, – tha Neuer në një deklaratë për shtyp. – Kjo është arsyeja pse ne nuk bëjmë kompromise kur bëhet fjalë për mbrojtjen nga dielli. Stërvitem jashtë gjatë gjithë kohës dhe gjithashtu më pëlqen ta kaloj kohën time të lirë në natyrë”.

Neuer nuk e kishte zbuluar më parë diagnozën e kancerit të lëkurës, sikurse afati kohor se kur i zhvilloi këto operacione mbetet i paqartë. Gjermani është aktualisht në rrugën e rikthimit nga një dëmtim në shpatull, që e ka përjashtuar atë që nga fillimi i tetorit. Portieri shpreson të jetë i aftë në kohë për tri ndeshjet e fundit të Bayern Munich, përpara Kupës së Botës në Katar.

Neuer shpreson të fitojë një Kupë të dytë Botërore. Ai ka 113 paraqitje për Gjermaninë dhe ishte mes shtyllave kur fituan Kupën e Botës 2014. Neuer mori çmimin “Doreza e Artë” gjithashtu në vitin 2014, dhe u emërua në të dyja ekipet “All-Star” të Kupës së Botës, më 2010 dhe 2014.