Filloi skenari i pështirë që mbajeni protestën larg politikës ose politikën larg protestës.

Për apolitikët e borderove të qeverisë: Kjo është një protestë politike

Nga Klodian Tomorri 

Filloi skenari i pështirë që mbajeni protestën larg politikës ose politikën larg protestës. Kjo është një tezë që e promovojnë me regji të komanduar në çdo protestë ata që bëjnë si opozitarë, por që financohen nga pushteti.

Kjo është protestë politike. Sepse nëse ky do ishte rasti i nje polici që lajthiti dhe bëri një krim, nuk ka nevojë fare pse të ketë protestë. Me atë do merrej prokuroria siç merret me çdo krim tjetër që ndodh.

Por kjo është politike. Sepse ndodhi një herë, shteti nuk reagoi, por bëri propagande. Ndodhi dy herë, shteti prapë nuk reagoi dhe prapë beri propagandë. Ndodhi serish. Dhe do ndodhë prapë nga polici apo gangsteri i radhës. Pra nuk është polici cub problemi, por shteti dhe ata që e drejtojnë shtetin.

Sepse nuk mund të jetë polici problemi, kur ministri i drejtësisë, policit tjetër cub që vjedh votat i premton se do ta gradojë. Ma nalt o burr ma nalt.

Sigurisht që nuk është polici problemi. Ai është produkti i qeverisë. Sepse modeli i tij është ish ministri i brendshëm, edhe ky me skaf privat dhe interesa në botën e trafikut. Si ky polici gjen në Vlorë, Berat, Shkodër, Tiranë dhe kudo nëpër Shqipëri. Sepse shteti i cubave këtë gjellë di të gatuajë.

Ndaj protesta është politike. Dhe politike nuk do të thotë që po e mbështet x apo y parti. Eshtë politike kundër qeverisë. Sepse kur qeveria kthehet në një bandë, që ka ndërtuar modelin e shtetit të cubave dhe kriminelëve, ajo duhet shporrur.

Ata që nuk e duan protestën politike, të shkojnë të marrin rrogën atje ku e marrin dhe t’i çojnë femijët e tyre nëpër plazhet, ku gjëmojnë skafet e policëve, trafikantëve, biznesmenëve të pushtetit dhe gjithë cubave e laskarëve të shtetit. Pa politikë fare.