“Deputetja Angela Rayner kryëzoi këmbët teksa i bënte pyetje Boris Johnson si për ta shpërqendruar atë, njësoj si Sharon Stone tek ‘Basic Instinct’, kështu shkruhej në një lajm gazete që si burim i referohej fjalëve të një deputeteteje të Partisë Konservatore, që donte të mbetej anonim.

Vetë Rayner e mohoi kategorikisht të ketë ndodhur diçka e tillë. Ajo e quajti një njollosje të çoroditur dhe tha: Grave në politikë u duhet të përballen çdo ditë me mizogjininë.

Politikanët e kanë dënuar gjithashtu një sulm të tillë. Një grup duke përfshirë gra deputete konservatore, por edhe burra, folën në mbështetje të saj.

Konservatorja Caroline Nokes tha se shumë deputete gra të të gjitha partive, kishin qenë në fund të fundit pre e artikujve të tillë të ulët, ndërsa ish-ministri Andrea Leadsom shkroi në Twitter: “Me të vërtetë më vjen keq Angela. Komentet dhe raportimet krejtësisht të papranueshme”.

Edhe vetë Johnson bashkë me liderin e Laburistëve Sir Keir Starmer kritikuan gjithashtu këtë shkrim. Johnson në Twitter shkruante: “Aq sa nuk jam dakord me Angela Rayner për pothuajse çdo çështje politike, unë e respektoj atë si parlamentare dhe dënoj mizogjininë e drejtuar ndaj saj në mënyrë anonime sot”.

Sir Keir shtoi: “Seksizmi dhe mizogjinia e përhapur nga konservatorët është një turp i ri nga një parti e zhytur në skandal dhe kaos”.

Një burim i Downing Street konfirmoi për BBC se kryeministri kishte kontaktuar gjithashtu me zonjën Rayner privatisht, duke përsëritur me një mesazh në telefon atë që shkroi në postimin e tij publik në Tëitter.

Mail on Sunday që publikoi lajmin nuk ka reaguar akoma.

Artikulli përshkruante më shumë se aq. Merrej me të shkuarën e deputetes duke e konsideruar: “një gjyshe që la shkollën në moshën 16-vjeçare teksa ishte shtatzënë dhe pa kualifikime përpara se të bëhej një punonjëse kujdesi”.

Rayner e dënoi artikullin në një postim në Twitter dhe i akuzoi burimet për përhapjen e shpifjeve të dëshpëruara, të çoroditura në përpjekjet e tyre të dështuara për të shpëtuar lëkurën e z. Johnson mes skandalit të partisë.

Ajo shtoi: “Nuk do të lejoj që gënjeshtrat e tyre të ndyra të më pengojnë. Përpjekjet e tyre për të më ngacmuar dhe frikësuar do të dështojnë. Shpresoj që kjo përvojë të mos e shtyjë një person të vetëm si unë, me një sfond si imi, të mos aspirojë të marrë pjesë në jetën publike. Kjo do të më thyente zemrën. Më shumë gra në politikë”.