Ish deputetja Rudina Hajdari thotë se pavarësisht përjashtimit të saj nga Lulzim Basha, ajo kishte kërkuar që të përfshihej në listat e kandidatëve për deputetë të PD në zgjedhjet e 25 prillit.

Në një intervistë për Fax News, Hajdari deklaroi se kërkesa e saj ishte refuzuar nga ish kryedemokrati.

“E kam shprehur publikisht se në zgjedhjet e 25 prillit të 2021 jam munduar dhe kam folur me funksionarë të PD por edhe me Bashën nëpërmjet një rrjeti të ngushtë që të kishte një përfshirje timen në listat e shkuara. Por kjo nuk ndodhi sepse Basha ishte kategorik ndaj rifutjes time në listat e PD, duke kujtuar përjashtimin tim që në momentin kur unë mbajta mandatin në 2019.

Gjithsesi kontaktet nuk i kam humbur dhe tani që jam bërë sërish pjesë e PD, mendoj që ripërtëritja e kësaj marrëdhënie do jetë shumë e shpejtë dhe një sukses brenda PD-së”, thotë Hajdari.

Kujtojmë se në zgjedhjet e 25 prillit, Rudina Hajdari shpalli kandidaturën për deputete nën siglën e “Nismës Thurje” në qytetin e Elbasanit.