Ish-deputetja Rudina Hajdari pohon se statuti i Kuvendit të 11 Dhjetorit do të ringrejë PD-në.

E bindur për ndryshimet e bëra në statut, Hajdari tha për Euronews Albania se me vendimet e miratuara në 11 Dhjetor, forcohet roli i anëtarësisë.  PD, sipas saj, tashëm duhet t’i rikthehet misionit që ka pasur.

“Partia Demokratike është një nga partitë më të rëndësishme dhe një aset kombëtar në kuptimin që ka sjellë demokraci në vend. Duhet t’i rikthehet misionit që ka pasur. Nuk mund të jetë partia e një individi, që e ka mbajtur peng për interesat e veta, qoftë personale, familjare apo të një grupimi të caktuar. Duhet të jetë një parti që gëzon një anëtarësi të madhe dhe të gjerë”, u shpreh Hajdari.

Ndër të tjera, Hajdari tregoi se ka pasur komunikim të vazhdueshëm me ish-kryeministrin Sali Berisha dhe se do të ketë diskutime edhe me anëtarë të tjerë të PD.

“Me zotin Berisha kam lidhje të vjetra familjare. Kemi pasur ato shkëmbime që kemi pasur gjithmonë, për këtë kam qenë e qartë. Diskutimi për PD do të bëhet duke u ulur në tryeza, komunikimi ka qenë i vazhdueshëm. Komunikimi do të jetë i hapur jo vetëm me Berishën, por me të gjithë anëtaret e Partisë Demokratike”, tha Hajdari.