Kanë nisur të intensifikohen lëvizjet në kampin tjetër të PD pas vendimit të Lulzim Bashës për t’u dorëhequr si kryetar i PD një ditë më parë.

Ish kryeministri Sali Berisha po bëhet gati për t’u rikthyer në selinë blu, vendim që e bëri të ditur për mediat pas mbledhjes së Grupit të Rithemelimit këtë mbrëmje.  

“Selia është e PD. Jemi në proces të vendimeve që do merren dhe PD do bashkohet , do shndërrohet në një forcë politike që nuk e ka patur më të fortë Shqipëria ndonjëherë”, tha Berisha kur u pyet nëse ka ardhur koha për t’u kthyer në seli.

Berisha komentoi edhe qëndrimin e Grupit Parlamentar të PD, i lexuar nga kreu i komanduar i PD, Enkelejd Alibeaj, ku u ka bëri thirrje deputetëve të Komisionit të Rithemelimit, që pas Bashës, të ofrojnë të njëjtin mekanizëm për tërheqjen e Sali Berishës.

“Ka vetëm një grup parlamentar i PD. Cdo deputet është i thirrur të ketë realitetin parasysh se nuk ka dy grupe parlamentare të PD. Nuk është se disa qëndrime absurde të Bashës nuk krijuan anomali në grupin e PD. Më imediate për deputetët është të normalizojnë jetën e grupit parlamentar. Kam dijeni se po punohet me intensitet në këtë drejtim dhe kjo do realizohet.

Sa i përket fletushkës që lexoi Alibeaj them se në atë fletushkë Bashën e shndërronte në plaçke tregu por kjo nuk është normale”, tha Berisha, duke shtuar se “Jemi të vendosur të punojmë për bashkimin e PD me ata që besojnë se votat e lirë e anëtarëve të saj duhet të bashkojë demokratët dhe u them se ka një mirëkupim të gjerë në këtë drejtim”.