Një nga personalitetet më të ndershem të politikës shqiptare është Pandeli Evangjeli. Veprimtaria e tij nis që në periudhën e Rilindjes Kombëtare në koloninë shqiptare të Bukureshtit. Pas vitit 1912 ai do të mbajë disa detyra të rëndësishme.

Në tetor 1921 ai do të bëhet kryeministri i parë ortodoks shqiptar. Gjatë gjithë karrierës politike ai do të zgjidhet disa herë deputet, katër herë kryeminister, dy herë kryetar Parlamenti dhe një herë kryetar i Senatit.

Pas ardhjes së komunistëve në vitin 1944 ai u mor nën hetim. Falë ndershmërisë dhe formimit si shtetar arriti që t’u argumentonte atyre nëpërmjet blloqeve të gjitha të ardhurat dhe shpenzimet personale, duke përfshirë edhe mënyrën sesi e kishte ndërtuar shtëpinë.

Kjo, mosha e madhe dhe kontributi i tij gjatë Rilindjes bëri që t’i shpëtonte burgut. Ai u dëbua në Korçë ku vdiq në shtëpinë e rrethit miqësorë.

Në historinë e Shqipërisë Pandeli Evangjeli është një nga politikanët më të ndershëm që duhet të shërbejë si model për brezat e rinj.