Deputeti demokrat Luan Baçi ka ngritur në seancën plenare si shqetësim “ndëshkimin” që po iu bëhet nga Kuvendi me “porosi” të Lulzim Bashës mbështetësve të Sali Berishës.

Ai bëri me dije se vendi i tij në Kuvend ka ndryshuar dhe tashmë duhet të ulet në rreshtin e fundit. Baçi iu drejtua kryeparlamentares Lindita Nikolla duke i kërkuar që të zbatojë rregulloren dhe jo urdhrat e kryedemokratit Basha.

Sipas tij, kjo është një porosi e Bashës. Baçi deklaroi se dikush i kishte thënë se vendin e ka në korridor. Deputeti theksoi se në Kuvend ndodhet prej demokratëve dhe jo nga Basha.

Ai i tërhoqi vërejtje Nikollës se nuk ia jep fjalën dhe kur e kërkon, duke e krahësuar këtë situata si me ndëshkimet që u bëhen nxënësve në shkolla.

“Është në detyrën tuaj të zbatoni rregulloren dhe të na jepni fjalën për procedurë kur e kërkojmë atë. Rastet kanë qenë të përsëritura personalisht me mua. Duhet që të çohemi në këmbë, ndoshta dhe të bërtasim për të marrë fjalën.

Do ta bëjmë edhe këtë në fund fare nëse nuk do të na kushtoni vëmendje. Seancën e parë u paraqita në Parlament dhe te vendi ku duhet të ulesha gjeta një emër tjetër.

Të paktën kur merrni një porosi nga një deputet i zakonshëm siç është z.Basha që mund t’iu sjellë shkresë pas shkrese për t’u ndërruar vendet deputetëve si nxënësit në shkollë dhe ju jeni drejtoresha e shkollës, kur duhet të dënoni një nxënës për ta çuar në rreshtin e fundit.

Mendoj se ju duhet të konsultoheni para se të merrni këto vendime, para se të bëni përjashtime nga grupi apo pezullime është në detyrën tuaj që ne të marrin informacion paraprak.

Dikush më tha se emrin e ke në korridor, do rrish në korridor. Mendoj se këtë vendin këtu nuk ma keni caktuar as ju, as z. Basha dhe askush tjetër. Dhe sa për dijeninë tuaj dhe të z.Basha unë jam deputet i qarkut të Fierit dhe deputeti më i votuar nga ata që radhiten atje në fillim. Mua më përjashtojnë vetëm demokratët dhe jo ju e Basha”, tha Baçi.