Kreu i Partisë Demokratike, Lulzim Basha, po zhvillon një takim me demokratët e Dibrës.

Në fjalën e tij, Basha tregon se arsyeja e mbledhjes, nuk është vetëm në kuadrin e një takimi, por edhe si një mundësi për të vendosur një kurs për të ecur para, duke e nxjerrë vendin nga humbja.

Nga ana tjetër, krydemokrati vuri në dukje edhe nivelin e varfërisë në vend, duke theksuar si më të prekura zonat në Veri dhe Verilindje.

“Ju falënderoj për mikpritjen dibrane. E ndjej këtë nxehtësi dhe e shoh mikpritjen jo vetëm në sytë tuaj por edhe në prezencën tuaj. keni ditur që në ditët më të vështira të kombit , t’i prini me zjarrin e patriotizmit në zemër dhe me vendosmërinë dhe qëndresë për demokraci e dinjitet. Këto janë vlera më të cilat krenohet Dibra. Vlera e burrërisë të familjes, të besimit në Zot  dhe patriotizmit kullojnë pastërtisht nga kjo trevë e bekuar. Arsyeja e kësaj mbledhje nuk është vetëm për t’u takuar, por që së bashku me vëllezërit e zhgënjyer në palcë nga regjimi të vendosim kursin për të ecur para dhe ta nxjerrim nga humbja ku e ka katandisur regjimi. Ky takim zhvillohet në kushte shumë të vështira, kudo anembanë Shqipërisë e në veçanti në treva të varfëruara me qëllim nga ky regjim siç është Dibra, siç është Bulqiza, siç është Mati, siç është Verilindja dhe Veriu në tërësi, por anembanë Shqipërisë edhe në Tiranë, 40% e familjeve nuk arrijnë dot të ngrohin shtëpitë e tyre. Ndërkohë që dimri jo vetëm ka trokitur, por po fillon me temperaturat nën 0, 50% e familjeve shqiptare, 1 në 2 familje shqiptare nuk arrijnë të paguajnë dot më shumë se një vakt të plotë për familjet dhe fëmijët e tyre. 90% e familjeve shqiptare, e shpenzojnë të gjithë buxhetin e tyre, pavarësisht se nga vjen, të ardhura për ata pak njerëz që janë në punë, apo fermerë, pensionist plus ndihmën që mund të marrin nga fëmijët në emigracion, punonjës të administratës apo të sektorit privat, s’ka rëndësi se nga i vijnë të ardhurat, 90% e të ardhurave shkojnë për nevojat bazë. Jo sikur të ishim në zemër të Europës, po sikur të ishim në një cep të harruar të Afrikës”, u shpreh Basha.