Kylian Mbappé do të jetë i lirë të negociojë apo të firmosë me skuadrën që dëshiron pas katër ditësh. Megjithatë, ndoshta nuk do ta dimë se cili është vendimi i tij përfundimtar, të paktën deri në përfundimin e ndeshjes së 1/8 kundër Real Madridit në Champions League.

Ky duhet të jetë plani i Mbappe për të ardhmen ku një ditë pasi u zgjodh lojtari më i mirë i vitit për Globe Soccer Awards, ylli i PSG-së foli në një intervistë në CNN në të cilën sqaroi zërat e merkatos dhe mundësinë për të kaluar te Real Madrid.

Pendohesh që i kërkove PSG-së të largoheshe në verë ? “Isha i sinqertë. Thashë atë që kisha në zemër. Unë jam shumë i lumtur që jam te PSG, Parisi është gjithashtu qyteti im. Unë jam francez… dua të fitoj gjithçka këtë sezon”.

Shanset për të luajtur për Real Madrid sezonin e ardhshëm? “Nuk është koha për të folur për të ardhmen time. Kam në mendje vetëm të fitoj ndaj Real Madrid në shkurt dhe mars. Jo, në janar nuk do të shkoj te Real Madrid. Unë do ta përfundoj sezonin me PSG-në, me siguri të plotë. Dua të jap gjithçka për të fituar një titull të madh për tifozët, mendoj se e meritoj”.

Ndeshja kundër Real Madridit: “Duhet të jemi të përgatitur. Është momenti më i rëndësishëm i sezonit. Sigurisht, ne duam të ecim përpara tani. Dy vjet më parë bëmë finalen, gjysmëfinalen më vonë, por tani duam të fitojmë Champions League”.

Qëndrimi në Paris: “Parisi është qyteti im, kam lindur këtu dhe aty jam rritur gjithashtu. Të luash për PSG-në është një ndjenjë e pabesueshme, pasi ke familjen dhe miqtë pranë”.

Të luash me Messin: “Është një kënaqësi e madhe për mua që mund t’u them fëmijëve të mi, miqve të mi se luaj me Messin. Duhet të kënaqemi duke e parë në Paris… Është një moment i pabesueshëm në historinë e futbollit”, përfundoi Mbappe në intervistën e tij.