Ish-deputetja e Partisë Socialiste, Arta Dade, ka shprehur rezervat e saj për nismën “Open Balkan”.

E ftuar në RTV Ora, Dade tha se nismës i mungon transparenca, ndërsa shtoi se përderisa tre vende nuk e pranojnë, nuk ka arsye për të trumbetuar me të madhe.

“Çdo nismë që synon bashkëpunimin është e mirëpritur nëse nuk bie ndesh me interesat e vendit. Nuk ka informacion dhe transparencë për nismën Ballkani i Hapur. Duhet të bëjmë kujdes për të avancuar nismat që nuk çojnë drejt stabilitetit. Tre vende nuk e pranojnë këtë nismë, nuk ka arsye për tu trumbetuar me të madhe. Ka mjaft pika takimi me nismën e iniciuar nga Merkel, Procesin e Berlinit”, tha Dade.

Ndër të tjera, Dade theksoi vendi duhet të fokusohet në nismat e Bashkimit Evropian, pasi “Ballkani i Hapur” është në favor të presidentit serb Aleksandër Vuçiç.

“Në vend që të fokusohemi te nismat e mbështetura nga BE dhe ndërkombëtarët nuk jam dakord të krijohen mbivendosje të nismave. Të bëjmë efektive nismat që përfitojnë të gjithë. Maqedonia e Veriut është e paqartë për qëndrimin që duhet të mbajë për këtë nismë. Ballkani i Hapur në favor të Vuçiç dhe imazhit të tij”, shtoi ish-deputetja.