Ish-kryeministri Sali Berisha mori fjalën në punimet e Kuvendit të thirrur nga vetë ai dhe të firmosur nga 4.934 delegatë të verifikuar sot.

Berisha bën fajtor kryedemokratin Lulzim Basha për gjendjen në të cilën ndodhet sot Partia Demokratike. ‘Një kallp opozitar’ e quajti Berisha teks ai renditi humbjet e njëpasnjëshme duke e akuzuar se ka mbrojtur interesat e tij dhe marrëveshjen me kryeministrin Rama, përballë demokratëve.

“Në krye të partisë demokratike erdhi një përfaqësues i gjeneratës së re që në vend ta fuqizonte, bëri të kundërtën e saj. Lulzim Basha, në 8 vite ‘de facto’ u faktua vetë si një kallp opozitar. Ai nisi drejtimin e partisë duke u përkulur në kundërshtim me ligjin, Kushtetutën fuqin e pakufishme të forcës që drejtonte. Duke u përkulur para regjimit të Edi Ramës. Dy vite pasi dorëzuam pushtetin Rama bllokoi çdo projekt për bashkinë e Tiranës. Të gjitha këto të mbështetura nga qeveria e PD-së. Duke pasur një armatë të tërë demokratësh kryetari ynë nuk lëvizi një gjethe në protesta të fuqishme në Tiranë dhe t’i vinte Edi Ramës kufirin te Thana. PD mbeti jetime sepse Lulzim Basha u kujdes për karrigen e tij, për marrëveshjen me kreun e meduzës”, deklaroi Berisha.