(Ose një vështrim i trishtë mbi median shqiptare)

nga Mentor Kikia

Episodi 1:

Më telefonoi drejtuesja e një programi në një TV:

-Vjen sonte në programin tim?

-Për çfarë do të diskutohet?

-Për çfarë? Për PD-në, për çfarë tjetër?

-Po pse vetëm për PD-në, sot ishte protesta e fermerëve, interesante.

-Nuk shikon njeri gjë tjetër veç politikës…

Episodi 2:

Gjatë një debati në një emision, e ngrita tonin në komunikm me një koleg dhe gjatë pauzës së reklamave i kërkova ndjesë. Ndërhyn moderatori:

-Ndjesë, po ca ndjese more por zihuni pak aty, s’na shikon njeri po nuk pati pak sherr.

Episodi 3:

-Do të filloj një program të ri- më tha drejtuesi i një kanali televiziv.

-Me çfarë tematike?

– Ja mo me lloqe, nga këto thashetheme grashë?

-Po pse nuk bëni ndonjë gjë më serioze, programe edukative për fëmijë, rininë, gjera sociale…

-Ça serioze more, lloqe do ky milet e shikon ti se çfarë ndjekin apo jo?

Episodi 4

Në një program debatohet 1 orë e 30 minuta dhe mediat online referojnë të gjitha një diskutim: Shpërthen Filani kundër Fistekut: Ti je i shitur, të paguajnë të flasësh kështu.

Në një tjetër program flitet 2 orë e gjysmë dhe mediat citojnë: Filani tha: Shqiptarët nuk janë të varfër, ata hanë vetëm pula, çdo ditë.

…Episodi N:

Çdo ditë emisionet e mëngjesit mbushen me telefonues që japin mend se si duhet të bëhet Shqipëria dhe që shajnë mbarë e prapë njëri-tjetrin.

Ka të paktën 35 programe të tilla në javë vetëm në TV-të e Tiranës. Shtoju dhe ato lokale dhe shumën gjejeni vetë.

Dini ju ndonjë program edukativ për fëmijët?

Ndonjë program edukativ për rininë?

Ndonjë program për problemet të shoqërisë, problemet sociale, mjedisit….

Ka tek-tuk ndonjë program modest ekonomie…

Përse? Nuk “shesin” – thonë producentët, pra nuk i shikon njeri.

Pra është faji i popullit që do vetëm programe “të degjeneruara” me “thasheme kurvash” dhe sherre politike?

Pra, ky popull meriton qëverinë që ka, klasën politike që ka, por meriton edhe median që ka, apo jo?

Unë dua ta shtroj për diskutim këtë çështje: Vërtet shqiptarët duan vetëm këtë lloj ushqimi mediatik dhe mediat i gatuajnë vazhdimisht të njëjtën gjë? Apo janë mësuar me këtë menu, ngaqë nuk u kanë vënë gjë tjetër përpara?

Unë nuk po tentoj të zbuloj vetëm realitetin e trishtë, mjerisht të trishtë, si në kampin e medias ashtu dhe në atë të konsumatorit të medias. Por dua të mësoj nëse kjo është vërtet kështu.

Unë jam duke punuar për të nxjerrë në transmetim një program. Dua të flas për probleme që lidhen me shoqërinë, korrupsionin, edukimin e rinisë, mjedisin, shkollën, dhunën, (in)tolerancën fetare dhe jo vetëm ….

Por, a mund të jetë kjo një meny më e mirë?

Unë e di që shumë prej jush jeni të gatshëm ta sulmoni median, si shërbëtore të politikës. Por ama ju jeni ata që e ndiqni atë që ajo ofron. Jeni ju që çdo lajmi me sherr i jepni mijëra shikime në rrjet. Nëse shikuesi do çdo natë dozën e tij të çorbës, atëherë të jeni të sigurtë, çorbë do ju gatuajnë çdo natë.