KUVENDI/ Basha “thyen në mes” Braçen dhe Spiropalin

Replika me Bashën pati edhe ministrja Elisa Spiropali. Ajo hodhi akuza të të forta ndaj kryedemokratit Basha për të cilin tha se i ka shpëtuar drejtësisë pa u hetuar me procedurë. Pas Spiropalit, Basha doli sërish në foltore që t’i përgjigjet me akuza po aq të forta.

TIRANË– Seanca plenare në Kuvendin e Shqipërisë ka nisur mes debatesh e replikash këtë pasdite. I pari që mori fjalën në foltore dhe nisi replikat ishte kreu i Partisë Demokratike Lulzim Basha, i cili tha se raportet tregojnë se Shqipëria mund të bëhet pjesë e unionit Afrikan pasi në atë Evropian nuk e pranon askush. Zërat në sallë e shqetësuan kryedemokratin Basha i cili u kërkoi gardianëve që të mbanin qetësi. Basha foli edhe për Vettingun në politikë një nga kërkesat e depozituara në Kuvend nga Opozita dhe tha se shumë prej atyre që ndodheshin në sallë u rrezikohej karrigia pasi ishin të lidhur me krimin. Pas tij, fjalën e mori kreu i grupit parlamentar të Partisë Socialiste, Taulant Balla, i cili tha se mirë do të ishte që të diskutonin për progress-raportin e Komisionit Evropian.

Deputeti i Partisë Socialiste, Erion Braçe u paraqit me foto në foltoren e Kuvendit të Shqipërisë. Ai kërkoi hetim për ndërtimin e rrugës Fier-Lushnje. Duke paraqitur fotot e nënkalimeve, Braçe bëri dhe batuta teksa tha se aty mund të kalonte ai vetë e papaqët, pasi Bashës do t’i prisheshin flokët, kurse kryeministrin Edi Rama do t’i hiqej koka. Pas tij, në foltore doli kryedemokrati i cili pyeti maxhorancën se përse nuk i ka rregulluara ato rrugë në tetë vite qeverisje. Basha rinxorri fotot e raportit për lidhjet e Shqipërisë me krimin e organizuar dhe me korrupsionin e shtoi se paratë e atyre rrugëve kanë përfunduar në duart e pushtetarëve e jo për ndërtim rrugësh.

Replika me Bashën pati edhe ministrja Elisa Spiropali. Ajo hodhi akuza të të forta ndaj kryedemokratit Basha për të cilin tha se i ka shpëtuar drejtësisë pa u hetuar me procedurë. Pas Spiropalit, Basha doli sërish në foltore që t’i përgjigjet me akuza po aq të forta. Kryedemokrati tha se ministrja Spiropali deklaron hapur në tavolina ku ulet se vetëm si drejtoreshë doganash ka nxjerrë mbi pesë milionë euro. Në fund publikoi dhe një foto të instituti ndërkombëtar, ‘World Justice Project’, dhe duke iu drejtuar Spiropalit tha se Shqipëria renditet e fundit për sundimin e ligjin në Europë, pasi aty e kishte çua ‘shefi’ i saj, kryeministri Edi Rama. Vetë ky i fundit ndodhet në Gjermani, aty ku edhe ka zhvilluar një takim me kryeministrin e Bavarisë, Markus Sober. Debate pati edhe mes Arben Ahmetajt e Enkelejd Alibeajt.