Oerd Bylykbashi është një nga deputetët e PD, që ka dalë hapur kundër vendimeve personale të kryetarit, Lulzim Basha dhe në krah të lëvizjes së ish kryeministrit, Sali Berisha për bashkimin dhe ringritjen e PD.

I ftuar në emisionin Opinion, Bylykbashi thotë se nëse nuk do të kishte një lëvizje të tillë, PD do të rikthehej në një dyqan 2 me 2 dhe një qepen me logon e partisë me Bashën brenda.

Më tej Bylykbashi tregon se prej vitesh në organizimin e partisë ka një koncept toksik.

Sipas Bylykbashit me largimet në PD, kjo parti do të zvogëlohej dhe nuk do të mund të fitojë zgjedhje.

“Unë e kam konstatuar situatën, Kam marrë një vendim sepse e shikoj se si është situata, nuk ekzistonte mundësia nëse nuk hynte në lojë Sali Berisha të ngrinte tezën e demokracisë që ne të kishim mundësi të konceptimi idenë e një Kuvendi që mund të rishkruaj statutin që të ndaj pushtetet dhe ti heq pushtet kryetarit të partisë. Do ikja unë dhe kushdo tjetër dhe do kishim një parti që zvogëlohet e do kthehej në një dyqan dy me dy me një qepen me logon e PD dhe me Bashën brenda. Ne tani kemi shansin që të rikthehemi. Në kemi disa vite që kemi një koncept toksik në parti. Ky është një tregus degradues”,tha Bylykbashi.