Ish-kryeministri Sali Berisha ka zhvilluar mbrëmje homazhe në bustin e Azem Hajdarit në 23-vjetorin e vrasjes së liderit të Lëvizjes Studentore të dhjetorit.

Ndryshe nga kryetari i PD-së, Lulzim Basha, i cili për herë të parë nuk u shoqërua nga ish-kryeministri Berisha. Kujtojmë që raportet janë krisur pas përjashtimit të Berishës nga grupi parlamentar i PD-së. 

Pas homazheve, në një prononcim për mediat Berisha përkujtoi Azem Hajdarin dhe tha se:

“Azem Hjadari do jetojë për jetë si një simbol i kurajës dhe guximit të jashtëzakonshëm njerëzor. Do frymëzojë të rinjtë shqiptarë në çdo kohë për të qëndruar në mbrojtje të lirisë dhe vlerat e saj. Askush në historinë e Sipërisë si individ, nuk ka bërë për lirinë e shqiptarëve aq sa ka bërë Azem Hajdari me guximin e tij dhe studentet liberatorë të dhjetorit `90.”

Ndërkohë, Berisha foli edhe për përjashtimin e tij nga grupi parlamentar i PD-së, ndërsa tha se Partia Demokratike ndodhet në një gjendje kritike.

“Shqipëria ndodhet në gjendjen më kritike të saj, në fakt po kështu edhe Partia Demokratike. Ndaj është në nderin dhe detyrën e demokratëve, kudo në Shqipëri, që të ngrihen, të ngrenë kokën lart. Trashëgimia e tyre e shkëlqyer u jep nder dhe frymëzim në cdo kohë.

Një poshtërim i pa dëgjuar dhe paparë ndonjëherë në historinë e partisë së lirisë, ka ndodhur dhe jam i sigurt se anëtarët mbështetësit, drejtuesit e të gjitha niveleve të PD, do të dinë të hedhin në koshin e plehrave, vendimin antistatutor, antiligjor, antidemokratik, të atij që sot është në krye të PD, por që dëshmon se mbi këtë tokë ka vetëm një interes, interesin e tij personal. 

Merreni këtu këtë prani sot, si zotim para tribunit legjendar, qe ne PD do ta ngremë në piedestalin që e meriton, që demokratët dhe demokratet nuk ka forcë në botë që ti mposhtë ata. Do ngrihen dhe do ecin të sigurt, më të bashkuar se kurrë, për të përmbysur regjimin e drogës, të vjedhjes dhe të pazareve”, tha ish-kryeministri.