Kryedemokrati Lulzim Basha, i shoqëruar nga nënkryetarët Jorida Tabaku, Grida Duma, Enkelejd Alibeaj, Alfred Rrushaj dhe të tjerë deputetë të PD, bëri homazhe në Memorialin e “Heroit të Demokracisë”, Azem Hajdarit.

Sot shënohen 23 vjet nga vrasja e Hajdarit. Për herë të parë, Basha nuk u shoqërua nga ish-kryeministri Sali Berisha. Kujtojmë që raportet janë krisur pas përjashtimit të Berishës nga grupi parlamentar i PD. Përveç Berishës, gjatë homazheve që bëri Basha mungoi dhe familja e Azem Hajdarit.

Mbetet për tu parë nëse ish-kryeministri do t’i zhvillojë më pas homazhet në nder të Hajdarit. Ndërkohë Basha, thotë se “vepra dhe sakrifica e Azem Hajdarit mbetet model frymëzimi për të mos iu nënshtruar dhunës së regjimit, për të luftuar me vendosmërinë e heroit të demokracisë dhe për të çuar deri në fund idealin e Shqipërisë si gjithë Europa”.

Ai shpreh mirënjohje për veprën e Hajdarit, ndërsa shton se kujtimi i tij i nxit demokratët që të qëndrojmë të bashkuar deri në triumfin e lirisë dhe demokracisë.

https://www.facebook.com/lulzimbasha.al/posts/4559080897476389