Futbollisti shqiptar Elseid Hysaj bëri xhiron e mediave italiane së fundmi, pasi këndoi këngën Bella Ciao në prezantimin me ekipin e ri të Lazios. Si çdo lojtar i ri në një ekip, edhe Hysaj respektoi ritin duke kënduar një këngë para shokëve të tij të skuadrës. Ajo që ai zgjodhi ishte Bella Ciao. Ajo që duhet të ishte një festë për ekipin, prodhoi një zemërim të madh duke u kthyer në një zhurmë të madhe mediatike.

Video që u shpërnda në rrjetet sociale, shkaktoi komente të rënda. Shumë nga Ultrasit e Lazios e bënë lojtarin “fajtor” për mosrespektimin e besimit të ekstremit të djathtë. Kishte edhe nga ata që kërkuan transferimin e tij të menjëhershëm.

Ultrasit e Lazios reaguan ashpër, të cilët arritën aq larg sa të ekspozonin një banderolë të turpshme në rrugët e qytetit: “Hysaj është një parazit, Lazio është fashist”.

Nga ana e tij, sportisti shqiptar shpjegoi se zgjedhja e tij lidhet mbi të gjitha me pasionin për seritë televizive, pa ndonjë referencë politike.

Kishte gjithashtu mesazhe mbështetje për Hysaj nga tifozët e tjerë të Lazios në rrjetet sociale, të cilët kërkuan të linin politikën jashtë futbollit. Hysaj së bashku me shokët e ekipit, i hoqi të gjitha videot nga rrjetet sociale.