Neritan Ceka ka komentuar në emisionin “Të Paekspozuarit” në MCN TV, rolin e politikës gjatë këtyre 30 viteve në Shqipëri. Ceka është shprehur se vetëm në Shqipëri ndodh që një njeri pa eksperiencë, të bëhet direkt ministër.

Sipas tij, në Shqipëri politika është “rrumpallë”.

“Unë mendoj se politika nuk është profesion sic është mjeku, sic është veterineri, pra duhet të ketë një përgjegjësi duhet të ketë një karrierë. I vetmi vend ku politika afron njerëz pa përvojë në poste të rëndësishme është Shqipëria. Pra, ti sot je askush, nesër bëhesh ministër direkt. Nuk po flas për deputetët. Pra, ti nuk mund të bëhesh Ministër i Jashtëm, se të pëlqen ty, nëse nuk ke kaluar në fazën e diplomacisë, nëse nuk e njeh mirë praktikën e shtetit. Dhe kjo ka ndodhur në Shqipëri rëndom.

Kjo ndodh në gjithë sferat. Në çdo vend ka shkallë, pastaj vjen momenti kur mund të bëhesh president etj.

Ky është një “aksident”i organizuar. Unë mendoj që jemi në periudhën e rrumpallës politike, e cila favorizohet edhe nga mentaliteti i votuesve. Votuesi shqiptar kur do të kurojë zemrën e zgjedh doktorin me 100 miq, kur shkon për të votuar nuk ka nevojë për asnjë rekomandim, merr pjeprin e parë që i nxjerrin përpara.

Ky është problemi i madh jo vetëm i politikës, por mënyrës si është organizuar, që nga mentaliteti ynë, i një populli që nuk ka jetuar gjatë në demokraci”, tha Ceka.

Jemi në teatrin e demokracisë, zgjedhje të lira nuk do ketë

Duke folur për zgjedhjet e 25 prillit, Neritan Ceka theksoi se në Shqipëri nuk do të ketë zgjedhje të lira dhe të ndershme dhe kjo sipas tij duhet pranuar.

I ftuar në emisionin “Të Paekspozuarit” në MCN TV, Ceka quajti demokracinë në vend të rreme dhe qytetarët aktorë, ku secili duhet të luajë pjesën që ka zgjedhur vetë.   

“Duke pranuar faktin e dhimbshëm që këtu zgjedhje të ndershme dhe të lira nuk do ketë, jemi në teatrin e demokracisë dhe do ta luajmë këtë pjesë, nuk kemi çfarë të bëjmë. Ky është një teatër i madh ku gjithë populli angazhohet, dikush shet votën, dikush e blen, dikush shkon me ndershmëri, ky është teatër ku secili ka rolin që ka zgjedhur vetë. Në ndryshim nga fakti që dikush ndihet humbës dhe dikush fitimtar do thoja këtë gjë që këtu ka dy fitimtar, i pari është fitimtar humbës, ky që e ka marrë pushtetin me gjithë këto borxhe dhe i dyti është humbësi fitimtar që në këtë rast është PD që më në fund u bë parti, ka një lider europian. Ne nuk kemi nevojë për heronj, një Skënderbe ishte, iku, u mbyll historia. Ne nuk na duhen heronjtë, heronjtë janë të rrezikshëm, na kanë shkatërruar, përveç Skënderbeut. Ajo që ka fituar populli shqiptar është një opozitë, kaq”, tha Ceka.