Deputetja Rudina Hajdari

Nisur nga vendimi i Departamentit Amerikan të Shtetit për ish-kryeministrin Sali Berisha, deputetja Rudina Hajdari u shpreh se SHBA-ja ka nisur ta konsiderojë shumë të rëndësishme luftën ndaj korrupsionit në Ballkanin Perëndimor.

Ajo tha për “Absolut 4” se fushata anti-korrupsion që ka nisur Amerika do të ketë pasoja edhe për zyrtarë të lartë të qeverisë shqiptare.

Deputetja nuk e cilësoi këtë lajm të keq, duke theksuar se SHBA dhe BE e konsiderojnë Shqipërinë si një pikë strategjike. Hajdari shtoi se në vendin tonë ka shumë politikanë të korruptuar.

“Vë re një përqasje të re të SHBA-së ndaj Ballkanit Perëndimor dhe korrupsionin e vlerësojnë si një çështje shumë të rëndësishme dhe do ta çojnë deri në atë nivel që ta cilësojnë si kërcënim të sigurisë kombëtare.

Mendoj se kjo do të ketë pasoja të tjera dhe një fushatë të madhe anti-korrupsion ndaj zyrtarëve të lartë të qeverisë shqiptare. Do të shikojmë edhe ngjarje të tjera në vijim. Ky nuk është lajm i keq për Shqipërinë. SHBA dhe BE e konsiderojnë Shqipërinë si një pikë strategjike.

Uroj që të ndodhë për të gjitha anët. E kemi parë shumë mirë se çfarë ka ndodhur në këto 8 vite. Ka shumë politikanë të korruptuar”, u shpreh Hajdari.