– Largimi i një mijë mjekëve specializantë nga vendet e tyre të punës, një vit pasi kontribuuan në spitale gjatë periudhës së pandemisë ka sjellë reagime të shumta në rrjet. Një prej tyre, është bërë nga avokati Adriatik Lapaj, i cili e konsideron një poshtërsi këtë vendim të marrë nga vetë Operatori i Shërbimeve të Kujdesit Shëndetësor.

Në një status në Facebook, Lapaj kërkon që kjo gjë të kthehet në kauzë deri sa të marrë zgjidhje, pasi këta mjekë specializantë janë hedhur në rrugë dhe u është thënë që të jetojnë me frymën e shenjtë. Madje Lapaj vetëofrohet t’i përfaqësojë këta mjekë në gjykatë.

Reagimi i plotë: 1000 mjekë specializantë po i heqin nga puna si mjekë familje. Specializimi zgjat 4-5 vite në varësi të degës. Po ju thonë jetoni me frymën e shenjtë. Në çdo vend normal mjeku, polici, magjistrati gjatë kohës së specializimit paguhet pa shkuar në punë (mjafton që shkojnë në shkollë), këtu mirë që si paguajnë, por i heqin dhe nga puna. Estradë. P.s vetofrohem t’i përfaqësojë këta 1000 mjekë në shesh dhe në gjykatë. P.p.s Ftoj të gjithë gazetarët dhe mediat ta kthejnë në kazus këtë poshtërsi deri sa të marrë zgjidhje.

1 mijë mjekë specializantë, të cilët u punësuan në sektorin publik të shëndetësisë gjatë periudhës së pandemisë dhe luftuan mbi një vit në spitalet COVID, kanë mbetur pa punë. Vendimin e ka lëshuar Operatori i Shërbimeve të Kujdesit Shëndetësor, ku theksohet ndërprerja e kontratës së punësimit me mjekët specializantë, pas kërkesës së bërë nga Ministria e Shëndetësisë.