Pak ditë më parë, opinioni publik u trondit nga një ngjarje e rëndë ku 23-vjeçarja Evgjeni Baxho e cila u gjet pa shenja jete, në trup kishte simbole ‘të çuditshme’. Dyshimet ishin se ajo ishte pjesë e një rituali fetar që mund të jetë i panjohur në Shqipëri. Profesori Ervin Karamuça shprehet i bindur se 23-vjeçarja nga Delvina që ka ndërruar jetë disa ditë më parë, ka qenë pjesë e një rituali fetar që mund të jetë i panjohur në Shqipëri.

Fillimisht në media u raportua se e reja vdiq pas një infeksioni në dhëmballë, por më vonë dolën detaje tronditëse. Në trupin e pajetë të vajzës ishin vizatuar disa simbole me ngjyrë të kuqe. Profesori thotë se personat që merren me këto sekte, kanë gjetur terrenin e lirë për të vepruar.

“Jam i bindur që vajza i është nënshtruar një rituali të fshehtë. Alarm i madh është pasiviteti i policisë. Në raste të tjera, kemi parë viktima që kanë agjëruar dhe janë vetëflijuar.

Duhet të ngrejë alarm edhe për krimet e mëparshme. Kanë filluar ta praktikojnë në Shqipëri, se jemi të prapambetur, kanë terren të pakufishëm për të abuzuar me të rinjtë me fëmijët. Kanë penetruar persona të caktuar nëpërmjet këtyre sekteve për t’i bërë këto rite”.

Ai i cilësoi si vrasës serialë. Eksperti shtoi më tej se viktima ka tentuar të dalë nga rrjeti, dhe e kanë asgjësuar.

“Ka disa praktika që kanë të bëjnë me frekuencat e trupit, për të ndaluar procese jetike në organizëm. Këta janë vrasës serialë…E kanë sakrifikuar. Kam dyshime që viktima do ketë tentuar të dalë nga rrjeti, dhe e kanë asgjësuar”.