Kandidatja e PD-së për Qarkun e Tiranës, Albana Vokshi i është përgjigjur akuzave të kryeministrit Edi Rama, i cili u shpreh se koalicioni opozitar shkeli të gjitha masat anti-covid dhe e konsideroi si vatër infeksioni mitingun e PD-së në sheshin “Nënë Tereza”.

Sipas Vokshit, virusi më i madh për Shqipërinë është kreu i qeverisë Edi Rama. Ajo tha se PD e kishte organizuar që qytetarët të qëndronin në makina, por ishte e pamundur që ata t’i ndaloje. Kandidatja demokrate për deputete shtoi më tej se nëse do të kishte pasur organizim nga PD në shesh do të ishin qindra-mijëra qytetarë.

“Ishte një ceremoni plot emocione. Ishte e papritur ajo turmë e madhe njerëzish, plot dëshirë për ndryshim. Ne kemi njoftuar që anëtarët të vinin me makina, por ishte e pamundur për të ndalur dëshirën e shqiptarëve për ndryshim.

Virusi më i madh është Edi Rama. Të rinjtë duan ndryshim. Të gjithë profesionet duan ndryshim, ndaj edhe ajo e djeshmja ishte me emocione. Nuk ishte një organizim i mirëfilltë me aq shumë qytetarë. Gjatë hapjes na telefononin me qindra të tjerë që kërkonin të ishin pjesë e ceremonisë së hapjes. Nëse do të kishte pasur organizim, do të të ishin qindra-mijëra qytetarë në shesh”, tha Vokshi në A2.