Kënga hit e viteve ‘70 “Dashuria e humbur” e grupit kosovar rock e risjellë në një version mjaft interesant “Hip Hop” nga MC Kresha, Lyrical Son dhe Ledri Vula.

Haki Misini, autori i këngës shumë të njohur “Dashuri e humbur” është një ndër artistët më të mëdhenj që ka humbur Kosova. Vokalisti i rock-grupit MAK është vrarë 17 vite më parë nga forcat serbe gjatë luftës në Kosovë.

I biri i artistit, Urim Misini, në atë kohë 11 vjeçar, rrëfen se i ati u vra pak orë para se të nënshkruhej marrëveshja për ardhjen e forcave të NATO-së në Kosovë.

“Veq e mbaj në mend dera, kur ka bo, edhe e kam parë nga dritarja duke e futur grupin në veturën e policisë”, kujton Urimi.

Grupi MAK i krijuar në vitin 1973, ishte ndër grupet më të njohura të asaj kohe. Pjestarët e këtij grupi konsideroheshin themelues të rock-skenës kosovare, si dhe quheshin pionierë të muzikës rock në Kosovë.

Anëtarët e këtij grupi ishin edhe Mehmet Tupella (po ashtu i vrarë nga forcat serbe, i cili konsiderohet ende i zhdukur), Rexhep Ismajli-Bulli, Halil Bajraktari, Sedat Isufi dhe Xhevdet Gashi.Disa nga këngët më të famshme në receptorin e këtij grupi listohen:

• Moj e mira te Pojata
• Dil në derë o moj vogëlushe
• Tri gota
• Tito
• Leskovik po fryn një erë