KM e citoi pro-shembjes, reagon aktori: Asnjëherë s’kam thënë ashtu!

KM thotë se Teatri Kombëtar duhet të shembet dhe aty të ndërtohen kulla dhe këtë sipas tij e kërkojnë edhe vetë aktorët.

Por shumë nga deklaratat e publikuara deri më tani nga Rama, janë përgënjeshtruar nga ata që ai citon në postimet e tij.

I fundit që ka reaguar është aktori i njohur shqiptar, Bujar Asqeriu.

Dje Rama nxori në Facebook e tij se Asqeriu ishte pro shembjes së Teatrit Kombëtar dhe ndërtimit të një të riu bashkë me kullat.

Por vetë Bujar Asqeriu i ka kundërshtuar citimin e tij nga Rama.

‘Ky ka qenë një qëndrim i kahershëm imi, publik, para mediave dhe publikut, ndërsa Kryeministri kap fraza të shkëputura të miat dhe i lidh. Unë kam kërkuar që me çështjen e Teatrit të merren arkitektët. Asnjëherë nuk e kam përmendur fjalën shembje, kam thënë që të flasin arkitektët. Këto qëndrime unë i kam mbajtur që para një viti e gjysmë, por atëherë më shikonin si armik të gjithë, madje Kryeministri, në atë kohë, më anatemoi’, u shpreh Asqeriu sot në shtyp.

Ai u bën thirrje dhe aktorëve të tjerë që për teatrin të bëjnë betejë vetëm artistët, duke e lënë larg politikën.

‘Devizën time unë e kam thënë: larg politikës. Aktorët shkojnë dhe nënshkruajnë në skenë me kryetarin e opozitës, unë nuk jam për këtë. Teatri është i detashmentit të aktorëve dhe artistëve dhe këtë e kam thënë që në fillim. Por vetëm studentët e përqafuan parullën time kur protestuan me devizën: Larg politika! Vetëm ata më kuptuan mua. Unë e kam thënë që ne jemi historikisht në opozitë me shtetin. Beteja jonë është me shtetin. Kujt i thua?! Ata duan të bëjnë karrierë politike dhe administrative, le të bëjnë, punë e tyre. Unë jam artist dhe qëndroj në këto pozicione’, u shpreh Asqeriu.