Violina e “Titanic” shitet për 1.7 milion dollarë

Një nga skenat më të veçanta nga filmi “Titanic” i vitit 1997 është ai ku orkestra luan për herë të fundit, ndërsa anija mbytet.

Një fakt shumë i njohur është se kjo ka ndodhur në të vërtetë. Violinisti britanik Wallace Hartley ishte udhëheqësi e tetë muzikantëve që kishin për detyrë të zbavisnin pasagjerët në anijen luksoze, por që përfunduan duke luajtur muzikë për t’i mbajtur njerëzit të qetë derisa anija shkoi nën ujë.

Hartley u mbyt bashkë me Titanic më 15 prill 1912 dhe trupi i tij u gjet dy javë më vonë, së bashku me violinën e tij të varur në qafë. Pas gjetjes së  kufomës së violinistit, instrumentin e tij e mori e fejuara e Hartley, në Angli, Maria Robinson.

Pasi u vërtetua origjinaliteti i instrumentit, violina u shit tek një blerës i paidentifikuar më 19 tetor 2013. Çmimi fillestar i violinës u vendos në 65,000 dollarë, por ofertat tejkaluan çdo pritshmëri, duke u shitur për 1,7 milion dollarë .