Edhe përpara se të fitonte referendumin e kësaj jave, presidenti autokratik i Turqisë, Recep Tayyip Erdogan ka shijuar stilin e jetesës së një diktatori.

Kështu shkruan gazeta britanike, Daily Mail.

Si shembull, gazetari Guy Adams merr rezidencën luksoze të Erdogan në periferi të Ankarasë.

“Pallati i Bardhë” ka 1100 dhoma, 250 prej të cilave përdoren nga familja e 63-vjeçarit.

E mbuluar me ar e mermer, ky pallat është sa 30 Shtëpi të Bardha dhe besohte se është pallati më i madh i ndërtuar në botë këto 100 vitet e fundit.

Raportohet se 7 milionë sterlina janë shpenzuar vetëm për tapetet.

5 milionë sterlina janë shpenzuar për 400 dyert e pallatit.

Çdo gotë në pallat ka kushtuar 250 sterlina.

Në pallat ka spa, pishina, banjo turke, sauna dhe vetëm fatura e ngrohjes shkon 500 mijë sterlina çdo vit.

Kostoja e projektit mendohet se ka shkuar mbi 500 milionë sterlina.

Sipas Daily Mail kjo ndodh në një vend ku më shumë se 2 milionë njerëz jetojnë me më pak se 3 sterlina në ditë.

Dy nga tre fëmijë në këtë vend jetojnë në varfëri.

Gazeta shkruan se ky pallat dërgon mesazhin: Erdogan ka pushtet absolut.

Gjykata vendosi në vitin 2015 se pallati është një ndërtim i paligjshëm.

Por Erdogan vazhdoi projektin.

Sot mund të bëjë akoma më shumë. Ai jo vetëm kontrollon çdo fije të gjyqësorit, por mund të qëndrojë në pushtet deri në vitin 2029.