Sipërmarrësi dhe Kryetari i Shoqatës së Industrisë Përpunuese, Adi Haxhiymeri, i ftuar në një leksion të hapur me studentë të Ekonomikut në UET

Ishte viti 1991. Shqipëria po kalonte nga një sistem komunist dikatorial me ekonomi të centralizuar në një sistem pluralist me ekonomi të lirë. Shumica e të rinjve po hynin nëpër ambasada për të ikur, por kishte nga ata që e nuhatën aq herët ekonominë e tregut dhe hapën bizneset e para. Adi Haxhiymeri ishte një prej tyre. I diplomuar për ekonomik në vitin 1986 ai ishte krejt i panjohur me ekonominë e tregut, por guximi i dha mundësinë t’i futej rrugës së biznesit duke privatizuar ish-mapon e fëmijëve në Tiranë. Kur shkoi ta regjistronte biznesin e tij tek Tatimet emri i kompanisë së tij mbante numrin 001, pra ishte i pari biznes që regjistrohej.

“Sigurisht unë nuk isha i vetmi, por isha i pari që regjistrohesha që të paguaja taksat, shumë të tjerë si unë në Tiranë e në rrethe morën guximin t’i hynin sipërmarrjes dhe pse me njohuri të pakta, por shumica vijuan biznesin pa u regjistruar një farë kohe. Shteti ishte i paorganizuar, njohuritë tona ishin thuajse zero, por në atë kohë ishin një plejadë biznesmenësh të rinj që kishin veçse guximin dhe logjikën e tyre, mbi të cilën vendosën t’i hynin kësaj rruge”- u shpreh Haxhiymeri në një leksion të hapur me studentë të Universitetit Europian të Tiranës.  Ai ishte ftuar në kuadër të leksioneve “praktika në auditor’ si pjesë e kurrikulave të shkollës Master në UET për të sjellë pranë studentëve CEO të kompanive dhe ekspertë të fushave të ndryshme.

Drejtoresha e programeve Master, Dr.Orkida Ilollari, e cilësoi të rëndësishëm këtë leksion me një nga biznesmenët e parë shqiptarë, i cili vazhdon të operojë në sipërmarrje për 26 vite rrjesht. “Historia e e futjes në biznes e zotit Hashiymeri, shembulli dhe këshillat e tij për aftësitë menaxheriale që u duhen drejtuesve të kompanive janë të dobishme për studentët që presin të dalin së shpejti në tregun e punës dhe pse jo të iniciojnë një biznes apo të drejtojnë një biznes”, tha Ilollari.

Aftësitë menaxheriale si çelës suksesi

Sipërmarrësi Adi Haxhiymeri aktualisht drejton kompaninë Prima, lider në sektorin e prodhimit të miellit, jo vetëm në vend, por dhe në Ballkan. Por në rrugën e tij të gjatë në fushën e biznesit ai është marrë me shumë sektorë. Duke u bazuar në temën e leksionit “Aftësia menaxheriale në një sipërmarrje të suksesshme”, ai u tha studentëve se një menaxher i mirë vlerëson të paktën tre komponentë në punën e tij; komunikimin me stafin dhe me bashkëpunëtorët, ku duhet shumë durim dhe mirëkuptim; investimin e vazhdueshëm në biznesin e tij dhe përshtatjen me zhvillimin teknologjik.

Duke folur për mundësitë që kanë sot të rinjtë për t’u marrë me biznes, Haxhiymeri tha se teknologjia dhe rregullimi nga ana administrative shtetërore, dy gjëra që mungonin në atë kohë, u japin përparësi bizneseve të reja, por nga ana tjetër ai tha se sot konkurenca është më e fortë dhe duhet më shumë punë.

Sa i përket arsimimit të të rinjve sot, ai ngriti shqetësimin që shteti nuk ka një strategji konkrete se ku do të fokusohet trajnimi i brezit të ri, që t’i shërbejë një fushe të caktuar të ekonomisë ku shteti ka synim zhvillimin e mëtejshëm, siç mund të ishte turizmi apo bujqësia. /Mapo