Kancelarja Merkel rikonfirmon kushtet e Bundestagut për hapjen e negociatave

Shqipëria duhet të vazhdojë rrugën e reformave që ka nisur në mënyrë që të avancojë në procesin e integrimit europian. Ka qenë ky mesazhi që kancelarja gjermane Angela Merkel ka dhënë për Tiranën zyrtare në konferencën e përbashkët për shtyp në Berlin me kryeministrin Rama.

“Është e rëndësishme që kjo rrugë të vazhdojë. Komisioni Europian ka përmendur 5 prioritete. Unë mendoj se në këto janë arritur ndryshime të rëndësishme”, ka thënë Merkel.

Mes të tjerash, kancelarja ka vlerësuar si një “aleat të rëndësishëm” Shqipërinë, duke e vënë theksin tek roli i saj në NATO dhe ka shprehur gatishmërinë e Gjermanisë për mbështetje të mëtejshme.

Nga ana e tij, kryeministri Rama, pasi i ka shprehur mirënjohjen e tij zonjës Merkel për mbështetjen, ka kërkuar nga lidershipi europian që të ketë ndaj Shqipërisë të njëjtën qasje luajale që Shqipëria ka ndaj BE-së.

Në fjalën e tij, Rama ka theksuar BE nuk duhet të përfitojë nga prirjet europiane të Ballkanit, duke paralajmëruar se historia në rajon mund të përsëritet.

“Ndryshimi në rajon lidhet me tërheqjen që Europa ka për ne. Por këtë situatë miqtë tanë europianë nuk duhet ta marrin si të mirëqënë. Sepse në rajonin tonë veprojnë edhe elementë të tretë, të cilët mund të përfitojnë në lëkundjen e parë”, ka thënë Rama.

Kreu i qeverisë shqiptare ka theksuar se, shqiptarët nuk presin një integrim të pamerituar dhe ka shtuar se detyrat që rrjedhin nga ky proces janë parë si një detyrim për qytetarët dhe jo si një barrë të lënë nga Brukseli.