Kreu i PSD-së, Tom Doshi, ka deklaruar për CNA se personi i vetëm me të cilin nuk do të bashkëpunojë është kreu i PD-së, Sali Berisha.

I pyetur se më kë do të bashkëpunojë pas zgjedhjeve, Doshi u përgjigj: “Vetëm me Sali Berishën nuk bashkëpunoj!”

Në takimin e tij elektoral në Korçë, Doshi theksoi se PD dhe PS nuk kanë më çfarë t’i japin elektoratit.

Sipas Doshit, Sali Berisha ka qëndruar 8 vite në pushtet si i korruptuar, ndërsa PS që sot është në pushtet shihen qartë problemet që ka me korrupsionin.

“Me thënë të vërtetën, të dyja partitë nuk kanë çfarë t’i premtojnë më elektoratit. Njëra ka ndenjur 8 vjet në pushtet – ai, Sali Berisha, si i korruptuar, dhe tani thotë se do të luftojë korrupsionin. Edhe këto që janë sot në pushtet, shihen problemet që kanë me korrupsionin. Ne jemi e vetmja shpresë – Partia Socialdemokrate që nuk ka pasur ndonjëherë pushtet – që të bëjmë ndryshimin në këto zgjedhje dhe të jemi afër njerëzve të varfër, njerëzve të sëmurë, afër personave me ndihmë sociale, afër pensionistëve, afër minatorëve, afër fëmijëve të sëmurë, afër të gjithë njerëzve në nevojë”, ka deklaruar Doshi.