Kryeministri Edi Rama në komunikimin “Sy m’sy” i është përgjigjur akuzave të Kryetarit të PD-së, Sali Berisha, për kopjimin e programit të opozitës.

Sipas Ramës kjo nuk është e vërtetë.

“U kopjua programi? Kjo është gjëja më qesharake në botë sikur bëhet fjalë për ndonjë kod atomik, a thua sikur bëhet fjalë për ndonjë kod kasaforte! U kopjua kodi i Da Vinçit! Këtë të pagës minimale ne e kemi thënë me kohë por nuk e ka pasur njeri mendjen. Ne e kemi thënë se në 2026, pas zgjedhjeve, pasi është e ndaluar.

Ne do ta përcaktojmë 500 euro, madje e kemi thënë edhe mekanizmin sesi do të bëhet. Kompanive nuk do t’u kërkohet për 18 muaj që të paguajnë detyrimet, përveçse t’u japin nga 100 euro më shumë punonjësve.

As nuk më shkon mendja të them na e kopjuan. Ky është një muhabet kot. Ajo që thotë “këneta”, veçse është një farsë e madhe, ka një falsitet të madh se ata thonë se në 12 maj këto do bëhen realitet, por kjo nuk ndodh. Ne themi do të bëhen në “Shqipëria 2030”, tha Rama .