Ellen Pompeo nuk e lejon vajzën të shikojë “Grey’s Anatomy” për shkak të të brendshmeve

Ellen Pompeo nuk e lejon vajzën e saj të vogël të shikojë “Grey’s Anatomy”.

Aktorja u shfaq në një episod të “Jimmy Kimmel Live” për të folur për serialin e saj të ardhshëm “Good American Family”. Gjatë intervistës, Pompeo dhe drejtuesi i emisionit, Jimmy Kimmel, folën për 20-vjetorin e premierës së “Grey’s Anatomy”.

Drama mjekësore debutoi në mars të vitit 2005 dhe u rikthye për sezonin e saj të 21-të në shtator 2024. Gjatë dy dekadave të fundit, seriali ka fituar një bazë krejtësisht të re fansash që po e shikojnë serialin për herë të parë.

Kur prezantuesi e pyeti Ellen Pompeo-n nëse ndonjë nga fëmijët e saj ishte në këtë grup fansash, ajo u përgjigj:

“Vajza ime 15-vjeçare e ka parë dhe tani vajza ime 10-vjeçare dëshiron ta shohë, por ajo nuk është gati. Shumë fëmijë në klasën e saj e kanë parë serialin”, tha ajo.

Më tej, aktorja bëri të ditur motivin se përse nuk e lejon vajzën të shohë serialin.

“Pa dashur të gjykoj prindërit e tjerë, nuk dua që vajza ime të më shohë ende me të brendshme në TV, por e kanë parë të gjithë shokët e klasës, ndaj… Kjo do të jetë një arsye shumë e mirë për të nisur një bisedë rreth atyre sekuencave”.

Pompeo ka luajtur në “Grey’s Anatomy” që nga viti 2005 dhe është shfaqur në më shumë se 400 episode si aktorja kryesore e serialit, Meredith Grey. Megjithatë, ajo u largua nga seriali në shkurt 2023 pas 19 sezonesh, me personazhin e saj që njoftoi se do të transferohej në Boston.

Përveç punës së saj si aktore, Pompeo është nënë e tre fëmijëve, nga martesa me producentin muzikor, Chris Ivery, me të cilin janë martuar që nga viti 2007. Së bashku kanë dy vajza dhe një djalë, Stella, Sienna dhe Eli.