Melania Trump bëri komentet e saj të para publike gjatë mandatit të dytë të Presidentit Donald Trump.

Zonja e Parë e SHBA-së shkoi në Capitol Hill për t’iu drejtuar ligjvënësve në mbështetje të atij që njihet si akti “TAKE IT DOWN”, një projekt-ligj i ri i cili synon mbrojtjen e viktimave të shpërndarjes jo konsesuale të imazheve intime dhe atyre të rreme të krijuara nga Inteligjenca Artificiale, që bëhet në formë hakmarrjeje.

Projektligji, i prezantuar nga senatori i Teksasit, Ted Cruz dhe senatorja e Minesotës, Amy Klobuchar, ka marrë mbështetje nga anëtarët e të dyja partive dhe tashmë ka kaluar në Senat. Shfaqja e Melanias në Kongres ishte një lloj largimi i saj prej reputacionit si një bashkëshorte e kreut të shtetit që kërkon të shmagë politikën.

“Jam këtu me ju sot me një qëllim të përbashkët që është mbrojtja e të rinjve tanë nga cënimi në internet. Prania e përhapur e sjelljes abuzive në domenin dixhital ndikon në jetën e përditshme të fëmijëve tanë, familjeve dhe komuniteteve. Trajtimi i këtyre çështjeve është thelbësor për krijimin e një mjedisi sa më të sigurt dhe mbështetës për ta.”

Zonja e Parë shtoi më tej se në botën e sotme që rend drejt Inteligjencës Artificiale, rreziku i shkeljes së privatësisë është jashtëzakonisht i lartë. Teksa  organizatat shfrytëzojnë fuqinë e të dhënave tona, kërcënimi i qasjes së paautorizuar dhe keqpërdorimeve të informacionit personal përshkallëzohet.

Ne duhet t’i japim përparësi masave të forta të sigurisë dhe të respektojmë standardet strikte etike, insistoi Melania Trump, ndërsa fjalët e saj u përshëndetën nga të pranishmit në sallë.