22 vjeçari Daud Ibrahim Dachia ka lënë vendlindjen e tij Nigerinë në Afrikë për të studiuar në Shqipëri. Dauti është në vitin e tretë të studimeve për Teologji në një nga universitetet  private  të vendit.

“Unë jam Dauti, studioj këtu, sepse doja të ndiqja studimet jashtë vendit tim”.

Për Shqipërinë nuk kishte dëgjuar më parë, por, zgjodhi që të ardhmen e tij t’ia besonte rekomandimeve të profesorëve të tij të gjimnazit.

“Nuk kisha dëgjuar për Shqipërinë, por ma rekomandoi shkolla jonë atje në Nigeri”.

Në Shqipëri 22 vjeçari thotë se ndihet i lumtur si në vendin e tij, ndërsa tregon se këtu më shumë i pëlqen Tirana, edhe pse ka vizituar një pjesë të mirë të qyteteve të vendit. Historia qindra vjeçare dhe tradita shqiptare, padyshim që kanë rënë në sytë e të riut.

“Më pëlqen Shqipëria shumë, por më shumë më pëlqen Tirana, sepse unë jetoj këtu. Durrës, Vlorë, Berat, kam vizituar. Të gjithë njerëzit këtu kanë respekt për Skënderbeun”.

Vështirësitë ishin të shumta për Dautin, pasi përshtatja në vendin tonë pas largimit nga një familje e madhe  me 12 anëtarë ishte tepër sfiduese. Mësimi i Gjuhës Shqipe ishte e vështirë, por, edhe në këtë rast, ai ia ka dal më së miri. I riu na tregon edhe fjalët e para që mësoi shqip, si dhe shprehjet më të pëlqyera të tij.

Cilat fjalë të pëlqejnë më shumë shqip?

“Më pëlqen sigurisht, dhe me rob shpie”.

Edhe përshtatja me ushqimin nuk ishte e lehtë, por, sot pas 3 vitesh qëndrimi në Shqipëri, Dauti ka gatimet e tij të preferuara.

“Më pëlqen pilafi, byreku me patate, fasulet dhe ballkavaja e sheqeparja”…

Pas përfundimit të studimeve Bachelor, ai planifikon që të studiojë  për  gazetari për  të ndjekur  rrugën e dy prindërve të tij.

“Më pëlqen gazetaria se dy prindërit e mi janë gazetarë”…

Vitet ikin shpejt, dhe studimet përfundojnë, por, Dauti e ka vendosur të qëndroj në kryeqytetin shqiptarë, pasi tashmë është miqësuar aq shumë  me Shqipërinë dhe njerëzit.

“Do rri të punoj këtu”./abcnews.al