Kryeministri Edi Rama ka reaguar ndaj komenteve të qytetarëve në programin “Sy m’sy”, ku një qytetar e akuzoi qeverinë për korrupsion dhe kërkoi dorëheqjen e tij, duke e krahasuar me një trajner që humbet pa marrë përgjegjësi.

Rama e kundërshtoi këtë dhe shpjegoi se përgjegjësia është personale, duke theksuar se Partia Socialiste ka demonstruar vullnet politik për të mos penguar drejtësinë, edhe kur disa ministra të mëparshëm janë dënuar apo janë shpallur të arratisur.

“Populli kur erdhe ti kishte besim, po dolët të gjithë hajdutë. Thua nuk kam gjithsesi kush vjedh,,, është njësoj si ai trajneri që skuadra vetëm humb dhe të thotë nuk mbaj përgjegjësi,,,dhe mos te kesh vjedhur ti prap s’ka me moral, jep dorëheqjen”, shkruan një nga qytetarët.

“Në 3 mandate kam pasur ja 60 ministra, dy ministra nga mandati i parë janë dënuar një tjetër është në paraburgim, mund të ndiqej fare mirë në gjendje të lirë dhe një tjetër, ish zv ministri ka marrë arratinë për t’i shpëtuar drejtësisë. Këto janë pasqyrë e vullnetit politik për të mos penguar drejtësinë, vullnet pa të cilin kjo nuk ndodhte kurrë.
Me ligj, hajdut është dikush që dënohet me prova, jo që dënohet e linçohet me gurë në pazar. Kjo vjen edhe për kryetarët e bashkive, disa të dënuar, e vërtetë, por të thuash të dolën të gjithë të dënuar është t’i bashkohesh korit të blegërimave.
Përgjegjësia e shkeljes së ligjit nuk është dot kolektive, ndërsa moralisht familja organizata partia dhe qeveria mbajnë përgjegjësi se si reagojmë ndaj rastit kur dikush shkel ligjin”, tha ai.

Në lidhje me deklaratën e Sali Berishës, lideri i PD-së, i cili ka kërcënuar se do të shkrijnë SPAK-un, Rama theksoi se kjo nuk do të ndodhë pasi, sipas tij, PD dhe Berisha nuk do të fitojnë votat në zgjedhjet e ardhshme të 11 majit.

“Ata që duan ta kthejnë përmbys reformën janë përballë nesh me premtimin që do shkrijnë SPAK-un, nuk kanë për të marrë votën dhe SPAK-ut nuk kanë çi bëjnë fare”, tha ai.