Katër muaj pas vdekjes tragjike të Liam Payne, e dashura e tij, Kate Cassidy, ka ndarë mesazhet e fundit që shkëmbyen para se ai të ndërronte jetë.

Kate, e cila ishte në një lidhje me ish-anëtarin e One Direction që nga viti 2022, tregoi se shkëmbimi i tyre i fundit i mesazheve ndodhi pasi ajo ishte larguar nga Argjentina për t’u kthyer në Florida.

Ajo kishte kaluar dy javë me Liam-in në Argjentinë, por ishte kthyer më herët për t’u kujdesur për qenin e tyre, Nala. Ndërkohë, ajo kishte zbukuruar shtëpinë për Halloween dhe mezi priste t’ia tregonte Liam-it.

“Mezi pres të kthehesh në shtëpi dhe ta shohësh si duket,“ ishte mesazhi i fundit që Kate i dërgoi Liam-it, sipas asaj që tregoi në një intervistë për The Sun, botuar më 5 shkurt.

Përveç mesazhit, ajo ndau edhe fotografinë e fundit që kishte shkrepur të këngëtarit: një moment nga një shëtitje me kuaj, gjatë pushimeve të tyre në Amerikën e Jugut. “Duket kaq i lumtur,” tha ajo për foton.

Vetëm tre ditë pas kthimit të Kate-s në Florida, Liam humbi jetën pasi ra nga ballkoni i dhomës së tij në katin e tretë të një hoteli në Argjentinë. Ai ishte 31 vjeç.

Autoritetet përcaktuan se shkaku i vdekjes së tij ishin plagët e shumta traumatike dhe gjakderdhja e brendshme dhe e jashtme. Megjithatë, hetimet vazhdojnë, pasi raporti toksikologjik zbuloi praninë e substancave në sistemin e tij në momentin e vdekjes.

Ndërsa për Kate-n, humbja e tij mbetet ende e vështirë për t’u pranuar.

“Nuk më duket ende reale që ai nuk është më,” rrëfeu ajo. “Po përpiqem të jem sa më e fortë, por ndjej se jeta ime ka ndryshuar kaq shumë.”

Dhe më tej shtoi: “Mendoj për Liam-in çdo sekondë të ditës.”