Presidenti amerikan Trump tha të dielën se do publikojë dokumentet e klasifikuara në ditët e ardhshme në lidhje me vrasjet e presidentit John F. Kennedy, senatorit Robert Kennedy dhe kreut të të drejtave civile Martin Luther King Jr.

Trump, i cili betohet sot, premtoi gjatë fushatës se do publikojë dosjet e fshehta të inteligjencës dhe të zbatimit të ligjit për vrasjen e JFK-së në vitin 1963, siç njihet gjerësisht presidenti i 35-të i Amerikës.

Ai kishte bërë një premtim të ngjashëm gjatë mandatit të tij 2017-2021 dhe në fakt publikoi disa dokumente në lidhje me vrasjen e JFK-së në vitin 1963. Por në fund ai u përkul para presionit të Agjencisë Qendrore të Inteligjencës dhe Byrosë Federale të Hetimit dhe mbajti të fshehura një pjesë të konsiderueshme të dokumenteve, duke përmendur shqetësimet e sigurisë kombëtare.

“Në ditët në vijim, ne do bëjmë publike të dhënat e mbetura në lidhje me vrasjet e Presidentit John F. Kennedy, vëllait të tij Robert Kennedy, si dhe Dr. Martin Luther King Jr. dhe tema të tjera me interes të madh publik,” tha Trump tha në një tubim në qendër të Uashingtonit.

Trump nuk qartësoi se cilat dokumente do publikoheshin dhe nuk premtoi një deklasifikim të plotë. King dhe Robert Kennedy u vranë të dy në vitin 1968.

Vrasja e JFK, në veçanti, është një çështje me shumë hijë të errëta. Vrasja i është atribuar një personi të vetëm, Lee Harvey Osëald dhe Departamenti i Drejtësisë dhe organet e tjera të qeverisë federale e kanë riafirmuar këtë përfundim në dekadat që kanë kaluar. Por sondazhet tregojnë se shumë amerikanë besojnë se vdekja e tij ishte rezultat i një komploti më të gjerë.