Uran Butka, dikur një nga emrat intelektual më të spikatur të Partisë Demokratike, ka folur në emisionin “Dekalog” nga Roland Qafoku për politikën që po përdor Sali Berisha për të ardhur në pushtet. Zoti Butka thotë që Berisha është tipi i revolucionarit bolshevik, që përdor çdo lloj forme për të ardhur në pushtet, edhe përmes dhunës. Por pikërisht për këtë arsye, Berisha do të humbasë, thotë Butka.

“Unë jam kundër këtyre protestave që bën Berisha. E djathta sot është në rrugë të gabuar si në 1944-ën. Sulmi i 8 janarit 2022 në selinë e PD-së është shenjë e luftës civile që Berisha e ka përzemër. Polemikat e mia me zotin Berisha kanë sqaruar shumë gjëra. Berisha mund të jetë kreu i PD-së. Ishte lufta brenda partisë që më bëri të largohem nga PD-ja dhe parimet e Berishës.

Me revolucion dhe përpjekje të tilla që organizon Berisha në Shqipëri, i bëhet dëm vendit, por edhe respektit dhe mbështetjes që kanë të huajt për Shqipërinë. Berisha është revolucionar i tipit bolshevik që kërkon përmbysje me çdo formë, me dhunë. Kjo bie në kundërshtim me parimet demokratike të shquara që përmend Konica, Mit’hat Frashëri.

Sepse sjellin më shumë dhunë. Mund ta marrësh pushtetin, por shenjat e dhunës dhe shkatërrimi mbeten. Kjo është edhe arsyeja pse Berisha do të humbasë. Nuk mund të fitosh me këto metoda. Shqiptarët janë lodhur nga lufta e brendshme, lufta civile, nga urrejtja për njëri-tjetrin. Nuk fitohet demokracia me luftë”, tha zoti Butka në DritareTV.