“Nëse do të vish” poezia më e lexuar në internet kohët e fundit

Nëse do të vish – Nga Bilbil Beqiri

Eja thjesht, si njeri,
pa trastat mbushur plot,
pa flori,
pa stoli,
trokit në derë me dashuri,
e portat e sarajeve të shpirtit
do t’i hap dy kanatesh për ty.
Po nëse do vish,
me një trëndafil,
pa dashuri ujitur,
me një rrugë,
pa dashuri stisur,
a si njeri,
pa dashuri rritur
kurrë mos eja të më gënjesh:
të gjitha portat e sarajeve të shpirtit,
deri në fund…
të kyçura do t’i gjesh.

Poezi të tjera nga autori

Poezia e gjyshit

Më erdhi keq vërtet për lepurin e mjerë.
Kjo s’është fabul, por ndodhi e rrallë:
e zuri iriqi, të shkretin, në ferrë.
Nuk vraponte dot, se ishte në hall.

Duroi sa duroi, por e zbrazi mërzinë:
iriqit në vesh i tha dy-tre fjalë:
“Po të mos kisha hijen e shqiponjës mbi shpinë,
iriq, ti mua do të më haje kakërdhinë”.

Mëdyshje

Një përqafim i harlisur
në krahërorin e ngrohtë.
Një mendje më thotë: “ik”,
zemra “rri”, më thotë.

Drejt derës – dy tre hapa…
Sa shpejt miklohem!
E kthehem rish prapa,
për ikjen pendohem.