Këngëtari i njohur, Fabian Basha, ka qenë dje i ftuar në emisionin “Live From Tirana”. Ish-anëtari i grupit të njohur, “Produkt 28”, komentoi famën, si ndikon ajo te VIP-at në botë por edhe në Shqipëri.

Pjesë nga intervista:

Si është fama kur vjen që në moshë të re?

Në një treg kaq të vogël si Shqipëria, mungesa e organizimeve të mëdha kur ti ke 50 mijë veta përpara, nuk të bëjnë që ti të kesh shumë lidhje me famën. Ne nuk kemi pasur lidhje direkte me famën, pasi kemi qenë disa 17-vjeçarë me shumë kohë nëpër duar, ishim në gjimnaz. Dhe orët preferonim t’i kalonim duke bërë ecje të gjata duke bërë filozofi për jetën, ose në studio duke bërë filozofi për jetën. Në Shqipëri, të famshëm të vërtetë nuk mund të konsideroj se ka, përveç një fushe që është politika. Politikanët janë ata të famshmit. Por kemi pasur dhe raste artistësh në Shqipëri të cilët kanë pasur fuqinë të ndryshojnë mendime, rasti konkret ishte Dr. Flori. Person publik është fjala e duhur për realitetin tonë. VIP të mirëfilltë, vetëm politikanët e kanë atë luks.

Çfarë ju bëri juve që të jeni me këmbë në tokë?

Kemi mbajtur njëri-tjetrin. Ka qenë një energji shumë e mirë mes nesh. Ishim me mendjen e fokusuar tek puna, jo tek shijimi i fryteve.

Ke ndonjë këshillë për të rinjtë që duan të ndjekin këtë rrugë sot?

Punë nga mëngjesi e deri në darkë dhe qëndro besnik i ndjesive të tua deri në fund.