Thomas Tuchel

Thomas Tuchel është zyrtarisht trajneri i Kombëtares së Anglisë.

Këtë lajm e ka bërë publik Federata e Futbollit Anglez e cila thekson se Tuchel i është besuar drejtimin i ekipit “Tre Luanëve”.“Ish-trajneri i Bayern Munich, Chelsea dhe Paris Saint-Germain do të jetë trajneri i ri i Tre Luanëve.

FA ka njoftuar se fituesi i Ligës së Kampionëve, Thomas Tuchel, është trajneri i ri Anglisë, teksa asistenti i tij do të jetë trajneri anglez me famë ndërkombëtare, Anthony Barry”-njofton Federata Angleze.

Mes alternativave që kishin për trajnerin e ri pas largimit të Gareth Southgate, te Anglia zgjodhën Tuchel si profilin më të përshtatshëm për t’i besuar drejtimin e Kombëtares.

Më tej, Federata Angleze bën me dije se Tuchel ka firmosur që më 8 tetor, por zyrtarizmi u vonua për të mos shpërqendruar ekipin në ndeshjet e Ligës së Kombeve.

“Vendimi për të rekrutuar Tuchel dhe Barry u miratua nga Bordi i FA në fillim të javës së kaluar, me Tuchel që nënshkroi kontratën e tij të martën më 8 tetor. Njoftimi u vonua për të minimizuar shpërqendrimin rreth kampit ndërkombëtar që sapo ka përfunduar”-njofton Federata Angleze.

Tuchel do të nisë punën në krye të Kombëtares angleze më 1 janar 2025, përpara kualifikueseve për Kupën e Botës 2026, që do të zhvillohet në Kanada, Meksikë dhe SHBA.

Ndërkohë trajneri i përkohshëm Lee Carsley do të mbetet në krye të “Tre Luanëve” deri në përfundimin e fazës së grupeve të Ligës së Kombeve muajin e ardhshëm.