Ish-Zonja e Parë e SHBA-së Melania Trump ka kërkuar përgjigje për të “zbuluar të vërtetën” pas atentatit për vrasjen e bashkëshortit të saj, ish-presidentit Donald Trump, gati dy muaj më parë.

Trump i shpëtoi për qime vdekjes kur Thomas Mattheë Crooks, 20 vjeç, hapi zjarr ndaj tij gjatë një mitingu në Butler, Pensilvani më 13 korrik. Incidenti ishte një “përvojë e tmerrshme, shqetësuese” për familjen, tha Melania në një video të postuar në X të martën. .

“Tani, heshtja rreth atentatit po bëhet më e rëndë. Nuk mund të mos pyes veten: Pse zyrtarët e zbatimit të ligjit nuk e arrestuan sulmuesin para fjalimit?”

Vrasësi i mundshëm u pozicionua në një çati aty pranë që ofronte një pamje të papenguar të kandidatit republikan. Një plumb goditi veshin e djathtë të ish-presidentit, ndërsa gjatë të shtënave u vra një pjesëmarrës në tubim dhe u plagosën dy të tjerë. Sulmuesi u vra më pas nga agjentët e Shërbimit Sekret.

Kongresi votoi njëzëri për krijimin e një grupi pune dypartiak për të hetuar atentatin. I përbërë nga shtatë republikanë dhe gjashtë demokratë, grupi i punës synon të shqyrtojë gabimet e mundshme të sigurisë në nivelet federale, shtetërore dhe lokale të zbatimit të ligjit që i paraprinë incidentit.

Në një intervistë muajin e kaluar, Trump akuzoi Presidentin Joe Biden dhe rivalen e tij demokrate, Kamala Harris, se ishin pjesërisht përgjegjës për atentatin.

“Unë mendoj se në një farë mase është faji i Bidenit dhe i Harrisit,” tha ai, duke pretenduar se ata “nuk ishin shumë të interesuar për shëndetin dhe sigurinë time.”