Aktualitet
Për kë të votoj më 2025-n?
Më gjej se kë të votoj vitin e ardhshëm!
Ja pyetja apo kërkesa e një të njohuri që në një fjali të vetme mbërthen dilemën e madhe të kohës që jetojmë në këtë vend. Sepse një ndër aftësitë e pamohueshme të këtij vendi, e jona në tërësi, por sidomos e mentalitetit që sundon në krye është që të bësh të qartë qytetarin se çfarë nuk do.
Për cilin të votosh në vitin 2025? Për Edi Ramën, Spiropalin, Belinda Ballukun, Erion Veliajn? Apo për Sali Berishën dhe familjen e tij?
Është një kurth i madh jo vetëm moral, por edhe praktik. Ti voton kundër shpresës tënde se gjërat do ndryshojnë. Se do të përmirësohen. Ti voton kufoma që ecin, njerëz që kanë patentën e banditit politik dhe që shtiren nga mëngjesi në darkë se u dhimbset Shqipëria të cilën po bëhen 40 vjet që premtojnë se do ta çojnë në Europë. E ca më mirë, do ta bëjnë si Europa.
Vjen e merr tjetër peshë kjo pyetje kur dëgjon kryeministrin Edi Rama të deklarojë se në vitin 2030, PS-ja duhet të jetë parti e 1 milionë shqiptarëve. Mos vallë kaq shqiptarë do mbeten këtu deri më atëherë? Mos vallë të gjithë po i nënshtrohen logjikës se është më mirë të votosh ata që janë në pushtet sesa të presësh nga një opozitë që është aksionere në kulla?
Ky është fundi i një sistemi politik që ngrihet, vepron dhe gjallon mbi vjedhjen me ligj. Çdo narrativë, çdo premtim përthyhet mbi praktikën tonë jetësore e cila në tregon qartë dhe lakuriq sesi janë punët, se kush vjedh, kush kullandris pasurinë dhe se çfarë do të bëjë me të. E keqja ka hyrë në shtëpitë tonë, te familjarët dhe të afërm, që pavarësisht historisë së afërt dhe të largët, kanë shtruar kurrizin dhe ulur sytë duke u bërë befas oshënarë të skuqur dhe mavijosur sepse mesa duket kjo ka qenë e vërteta jonë, e anatomisë sonë politike.
Vitet ’90 kanë qenë me siguri një aksident i lumtur i një brezi që erdhi pa dashje përballë lirisë dhe demokracisë, shpesh me pamje anarkie, por që në fund të fundit përjetoi shpërbërjen e një rendi dhe fillimet e një tjetri, duke shpresuar më të mirën, pa e parë se e keqja ndër ne është te rrënjët.
